五年之約
今天是2011年1月1日,祝各位天天健康快樂! 尤記得去年八月尾楊江生日,我在這裡貼了一文,題為「送上一碗牛爽腩河,賀楊江五十三歲牛一」,末處引用聖經: 「義 人 死 亡 、 無 人 放 在 心 上 ,虔 誠 人 被 收 去 、 無 人 思 念 ,這 義 人 被 收 去是 免 了 將 來 的 禍 患 。」 -- 以 賽 亞 書 五十七章 一節
當時心想,天父早早接楊江返天堂,收去這個義人,可能是心痛他在地上捱得辛苦,仲要忍我呢個咁煩的老婆,所以有此一著,免了他將來的禍患。
貼文兩個月後,忽然收到一個電郵,時為2010年10月28日,講乜東東?吓!好誇張,原來是一個跨年之約,約我和一眾老友2011年1月見面,預早兩個月發電郵相邀,十分認真,所為何事?有心得很,乃是Linda建議去寶福山探望楊江,令我十分感動!
電郵內文如下:
「WOW!真係老土到打幾個冷震! 不過又唔由得唔用咁老土起首句︰時光飛逝! 冇見個亦師亦友楊老江就快五年了,當然諸位收件人都有段時間冇見了,各位好! 細佬我有個諗法︰相約各位2011年1月2日,下午三點,去沙田寶福山探探楊江(叉姐︰楊江冇搬竇嘛?),日係禮拜日。 有空有緣就見啦。 Linda 」
聖經說「義 人 死 亡 、 無 人 放 在 心 上 ,虔 誠 人 被 收 去 、 無 人 思 念 」,看來並非必然。
深深感謝大家對楊江念記,對我的關懷...
惠儀 ("叉姐"是我在中大新聞系唸書時,小師弟們給我起的外號,皆由我的同班同學倪淑芬,見我周時個胃唔舒服,笑我是"張胃差",簡稱惠叉,後輩是以尊稱叉姐也。)
|